ကရင်ပြည်နယ်၊ ဘားအံမြို့နယ်၊ လွန်းညစံပြကျေးရွာက ဒေသခံလယ်သမားတွေကို ခရိုင်ကျေးလက်ဦးစီးဌာန၊ လက်ထောက်ညွှန်ကြားရေးမှူးက တရားစွဲဆိုထားပါတယ်။

ပြည်သူသွားလာရာလမ်းပေါ် ခရီးသွားမှုနဲ့ ပစ္စည်းသယ်ဆောင်မှုအတွက် မသွားလာအောင် ပြုလုပ်မှုနဲ့ ခရိုင်ကျေးလက်ဦးစီးဌာန၊ လက်ထောက်ညွှန်ကြားရေးမှူး ဦးစောကျော်မင်းဦးက တရားလိုလုပ်ပြီး အမှုဖွင့်တိုင်ကြားခဲ့ရာ အိန္ဒုနယ်မြေရဲစခန်းက (ပ)၆၈/၂၀၁၈ ရာဇသတ်ကြီး ပုဒ်မ ၄၃၁ နဲ့ ဒေသခံလယ်သမားတွေကို အမှုဖွင့်လှစ်ခဲ့တာလို့ ရဲအုပ် မင်းအောင်ထွန်းက ပြောပါတယ်။
ဒေသခံလယ်သမားတွေဘက်ကတော့ လယ်ယာသုံးလမ်းကို တရုတ်ကုမ္ပဏီပိုင် ကျောက်သယ်ယာဉ်ကြီးတွေ ဖြတ်သန်း သွားလာနိုင်ဖို့ လမ်းမြေသား မြှင့်တင်ဆောင်ရွက်ထားတဲ့အတွက် စိုက်ပျိုးရာသီအမီ လယ်ယာသုံးစက်တွေ အသုံးပြု သွားလာနိုင်အောင် ဒေသခံလယ်သမားတွေ စုပေါင်းပြီး ပြန်လည်ပြုပြင်ခဲ့တဲ့အတွက် အမှုဖွင့် တရားစွဲဆိုခံခဲ့ရတာလို့ ပြောပါတယ်။

လွန်းညစံပြကျေးရွာကလယ်သမား ဦးစောငြိမ်းဖြူက “နိုင်ငံတော်ဘတ်ဂျက် ကုန်ကျစရိတ်နဲ့ လုပ်ထားတဲ့လမ်း မဟုတ်ဘူး။ ကျနော်တို့ လယ်ယာသုံးလမ်းကို လယ်သမားတွေ အသုံးပြုနိုင်အောင် ပြန်လုပ်ထားတဲ့လမ်းကို ဘာဖြစ်လို့ ဥပဒေနဲ့ ပြန်ပြီးတော့ အရေးယူခံရတာလဲ။ ကျနော်တို့ နစ်နာထားတဲ့ဟာတွေ အစိုးရကမကူညီပဲနဲ့ CRBC ကုမ္ပဏီကို သူတို့က ပံ့ပိုးပေးတဲ့သဘောမျိုး ဖြစ်နေတယ်”လို့ ပြောပါတယ်။

ဘားအံမြို့၊ ၈၈ ကရင်မျိုးဆက် ကျောင်းသားများ လူမှုဖွံ့ဖြိုးရေး၊ ဗဟိုအလုပ်အမှုဆောင်၊ ဥက္ကဋ္ဌ ဦးစောမောင်ကြီးက “ကုမ္ပဏီကနေပြီး အားကိုးပြီးတော့ ဖိအားပေးပြီး အဓိက ဒေသ အာဏာပိုင်တွေက လယ်သမားကို တရားစွဲတာပေါ့။ ဒေသအာဏာပိုင်တွေ တရားစွဲရခြင်းက ကျနော်တို့ရဲ့ကိုယ်စားမပြုဘူးဆိုတာ ပေါ်လွင်ထင်ရှားစေတာပါ။ လူတစုစာအတွက် ခရိုနီတွေ၊ ဒါမှမဟုတ်ရင် ဒေသအာဏာပိုင်တွေ အကျိုးရှိမယ့် လူတွေအတွက်ပဲ အကာအကွယ်ပေးနေတာ။ ကျနော်တို့ တိုင်းရင်းသားတွေအတွက် အကာအကွယ်မပေးဘူးလို့ ကျနော်တို့က လက်ခံထားပါတယ်” လို့ ပြောပါတယ်။

အမှုဖွင့်တရားစွဲဆိုခဲ့တာနဲ့ ပတ်သက်ပြီး သက်ဆိုင်ရာကို သွားရောက်တွေ့ဆုံမေးမြန်းရာမှာ တွေ့ဆုံခွင့်မရခဲ့လို့ ဖုန်းနဲ့ပြန်လည်ဆက်သွယ်ရာမှာ အမှုဖွင့်တရားစွဲတာ ပြည်နယ်မှူးက ခိုင်းလို့ ဆောင်ရွက်ခဲ့ရတာဖြစ်ပြီး အသေးစိတ်သိချင်ရင် ပြည်နယ်မှူးထံ သွားရောက်မေးမြန်းပါလို့ လက်ထောက်ညွှန်ကြားရေးမှူး ဦးစောကျော်မင်းဦးက ပြောပါတယ်။

လွန်းညကျောက်တောင်ကနေ အာရှလမ်းသစ်စီမံကိန်းအတွက် ချစ်လင်းမြိုင်ကုမ္ပဏီက ကျောက်ထုတ်ယူ လုပ်ကိုင်ခွင့်ရရှိထားပြီး ကျောက်ကျင်းပေါင်း ၁ သိန်း ၃ သောင်းကို ၃ နှစ်အတွင်း ထုတ်ယူသွားမှာဖြစ်ပြီး ထွက်ရှိလာတဲ့ကျောက်တွေကို လယ်ယာသုံးလမ်းကနေ တရုတ်ကုမ္ပဏီ (CRBC) ပိုင် ကျောက်သယ်ယာဉ်ကြီးတွေနဲ့ သယ်ယူနေတာပါ။

လမ်းကို အသုံးပြုနေတဲ့ အချိန်မှာလည်း ပြုပြင်ပေးမှာဖြစ်သလို အသုံးပြုပြီးရင်လည်း ဒေသခံတွေ လိုချင်တဲ့ သဘောအတိုင်းဖြစ်အောင် လုပ်ဆောင်ပေးမယ်လို့ ကျောက်ထုတ် တာဝန်ခံက ပြောဆိုထားပေမယ့် ယနေ့တိုင်း လာရောက် ညှိနှိုင်းတာမရှိဘူးလို့ ဒေသခံတွေက ပြောပါတယ်။

သတင်း – ရဲမင်းခေါင်